Regjeringa har forlenga dei nasjonale smitteverntiltaka til i første omgang 13. april. Styresmaktene ber befolkninga om å unngå alle reiser som ikkje er nødvendige, både innanlands og utanlands. Det gjeld også det å reise heim til påske og andre typar feriar.
Unngå offentleg transport og andre stadar der du lett kjem nær andre, viss du kan. Dei som kjem frå reiser i utlandet skal i karantene. Helsepersonell som jobbar med pasientbehandling er forbodne å reise til utlandet.
Kva med besøk til vener og familie?
Dei i familien som er friske og bur saman, kan vere i lag som vanleg. Det gjeld også barn i skilde familiar. Besøk og samvær med andre utanfor familien bør avgrensast.
Viss du er i ei risikogruppe, er råda ekstra viktige for deg. Har du tenkt å besøke slektningar over 65 år? Då må du tenke på at dei er i risikogruppa for å bli alvorleg sjuke viss dei vert smitta av koronaviruset. Barn og vaksne med kroniske sjukdomar er også i risikogruppa. Dei må skjermast frå smitte.
Kan eg dra på hytta?
Nei, som hovudregel ikkje. Det nasjonale forbodet betyr at du ikkje kan overnatte på hytta, viss hytta ligg i ein annan kommune enn den du er folkeregistrert i. Det einaste unntaket frå regelen gjeld viss du er i karantene fordi du deler husstand med ein som er bekrefta smitta av koronaviruset. Då kan du og andre friske familiemedlemmer overnatte på fritidseigedomen så lenge den smitta er i isolasjon. Den smitta skal vere heime. Ingen kommunar gir dispensasjon frå desse reglane.
Kva kan ein finne på i påska?
Kanskje du vil utforske ein sti eller turveg du ikkje har gått på før?
Ulstein bibliotek deler ut bøker etter avtale. Ta kontakt på e-postadressa bibliotek@ulstein.kommune.no eller ring 70 01 77 17 mellom klokka 9 og 16 på kvardagane. Du kan også låne e-bøker på nettet. Sjå nettsida til biblioteket.
Dei offentlege leikeplassane og idrettsanlegga utandørs i Ulstein er opne, men hugs: god og hyppig handvask, ver heime ved sjukdom, hald to meters avstand og ver ikkje fleire enn fem personar i lag.
Meld deg gjerne til frivilligsentralen viss du kan hjelpe sambygdingar med innkjøp av mat og apotekvarer: inger.dimmen@ulstein.kommune.no, tlf. 98 23 06 13 (mellom kl. 10 og 14 på kvardagar).
Ta gjerne ein ekstra telefon til nokon som vil bli glad for å høyre stemma di. Tilby deg å hjelpe med praktiske ting.
Mange aktørar, både lokale og nasjonale, byr på oppleving og fellesskap på internett. Sjå etter – og tips gjerne andre om det du finn.
Førebygg smitte
Det er viktig at alle hugsar å
-
vaske hendene ofte og nøye
-
halde to meters avstand til andre
-
vere i lag med så få personar som mogleg (Generelt: ikkje fleire enn fem i lag. Barn og unge: maks i lag med to vener gjennom perioden der skulane er stengde.)
-
unngå å hoste ut i lufta
-
halde seg heime viss ein er sjuk
-
respektere reglane som gjeld i karantene og isolat
Viss du har teikn på luftvegsinfeksjon (nysing, hoste, tung pust og/eller feber): Ikkje ver saman med eldre eller personar med nedsett immunforsvar.
Vi ønsker alle ei god påske!