– Det er kjekt å sjå at vi klatrar to plassar opp frå femteplassen i fjor, seier arkivleiar i Ulstein, Silje Ekroll Riborg om årets tredjeplass i Åpenhetsbarometeret 2022, frå Pressens offentlighetsutvalg og Kommunal Rapport.
– Vi jobbar stadig med å forbetre oss. Vi skal vere gode på innsyn, og dette viser at vi gjer mykje rett i Ulstein. Det er godt å sjå det svart på kvitt, og det gir motivasjon til å halde fram det gode arbeidet.
Best i fylket
Møre og Romsdal er overrepresentert blant kommunane i toppsjiktet, samtidig som det generelle nivået er høgt. 22 av 26 kommunar ligg over landssnittet på 11 poeng.
Aller best gjer Ulstein, Volda, Rauma og Averøy det, med 19 av 20 poeng. Vi er dermed på delt førsteplass i fylket, og delt tredjeplass nasjonalt.
– Alle fire svarte på innsynskrava våre kjapt, og dei har postlister med gode moglegheiter for søk. Her er det meste på plass av det vi måler, og dei som vil søke informasjon eller be om innsyn hos kommunane har svært gode arbeidsvilkår, står det i rapporten.
Lenke: I fjor kom Ulstein på femteplass i den same kåringa
Landets mest opne kommunar er Rindal og Ørland i Trøndelag. Verst ut kom Hvaler.
Kva mangla?
Det var ikkje mykje som mangla for at Ulstein skulle fått full pott og 20 av 20 poeng.
– Ulstein fulltekstpubliserer for få dokument til å få full pott. I perioden vi undersøkte var om lag 60 prosent av dei offentlege dokumenta i journalen publisert i fulltekst – noko som likevel er over snittet, men ikkje nok til å full pott, står det i rapporten.
Heile rapporten kan du lese her
Vil du ha innsyn?
Postlister og politiske dokument
- Ei postliste viser ei oversikt over all post sendt til og frå kommunen, i tillegg til interne dokument i Ulstein kommune.
- Alle kommunar er pålagt å offentleggjere ei postliste.
- All post folk sender til kommunen er journalpliktig og vert registrert og vist på postlista. Dokument som inneheld sensitive opplysningar, som til dømes personnummer eller helseopplysningar, er unnateke offentleg innsyn.
- Det er mogleg å søke i postlistene. Til dømes kan du søke på ditt eige namn som avsendar og få opp alle offentlege brev som er sendt til og frå deg.
Les også: Ulstein best i test – førsteplass i kommunebarometeret
Resultat i Møre og Romsdal