Sofie Møller er bibliotekar ved Ulsteinvik barneskule. Janne-Marit Myklebust

– Elevane kjem hit heile tida for å leite etter bøker, så interessa er stor, seier Sofie Møller som er tilsett som bibliotekar på deltid på Ulsteinvik barneskule.

I tillegg til deltidsjobben studerer ho også til å verte bibliotekar.

Dei siste åra har skulen brukt Ulstein bibliotek på Ulstein Arena for å låne bøker, men dei har lenge ønskt seg biblioteket tilbake til skulen. No ligg det lett tilgjengeleg der elevane ferdast. 

– Men vi har ei stor målgruppe her på skulen med mange elevar og fleire klasser på same trinn, og berre to-tre eksemplar av dei mest populære bøkene. Så dei er ikkje så lett tilgjengelege.

På ønskelista

No frir altså Møller til innbyggarane, med eit stort mål om å fylle opp hyllene og auke leselysta og lesegleda blant dei unge.

– Vi har avgrensa med plass, og må vere litt selektiv med kva vi kan ta imot, men vi treng meir skjønnlitteratur, helst av nyare dato. Eg har merka meg at dei bøkene eg elska å lese som ung, ikkje nødvendigvis er dei same som dei unge les i dag. 

– Vi ønsker oss også faktabøker. Fotballbøker er populært, og Guinness World Records – dei vi har er utslitne og frå 90-talet. 

På ønskelista står også fleire nynorske bøker.

– Det er ei generell mangelvare, bortsett frå Maria Parr og bøkene frå den såkalla “lettlest”-serien for 1.–3. trinn, seier Møller.